E to’atolu ni tagata ua maliliu mai se faalavelave tau taavale. I ripoti mai le leitio faavaomalo a Niu Sila, o lenei faalavelave na aafia ai se loli poo se tanker ma se taavale i le auala ua faaigoaina o le Desert Road i le aga’i i le itu ogatotonu o North Island.
Na tula’i mai lenei faalavelave poo le 5 kilomita i Mātū o Waiouru, i le va lea o Shawcroft Road ma Access Road No.17 poo le toe 10 minute i le itula e 12 i le vaveao o le taeao o le Aso Lua, o le asō lea.
I ripoti e faapea na maliliu ai lava i latou e to’atolu i totonu o taavale na aga’i atu ai, ae ta’ua na o le ‘aveloli na faasaoina mai, ma na manu’a mitimiti o ia.
Faamauina le faaaogāina o le vaalele lavea’i poo le helikopa e fesoasoani i le galuega sā’ili a leoleo, ia mautinoa e lē o iai se isi tagata na aafia i lenei faalavelave mata’utia.
Faailoa e le alii faatonu o le pou i Whanganui – Area Commander Inspector, Neil Forlong, o se tala faanoanoa le ma’umau ai o soifua o nei tagata e to’atolu ma o se tulaga mata’utia tele.
Ae ua ia faafetaia sui o faalavelave tutupu faafuase’i uma na galulue i lenei matāupu.
O loo faasolo pea su’esu’ega i le māfua’aga o lenei faalavelave.
Puna o Faamatalaga: https://www.rnz.co.nz/news/emergencies_local/593547/state-highway-1-desert-road-between-rangipo-and-waiouru-closed-after-truck-car-crash
