O le galuega a tusitala ma le aufaasalalau i soo se auaunaga i Samoa ua faafetaia e le Pule Sili o le kamupani telefoni o le Vodafone Samoa, ina ua tauaao e le pulega o le kamupani i lenei vaiaso lana fesoasoani i le faamanatuina o le 50 tausaga o le JAWS le faalapotopotoga o tusitala ma le aufaasalalau i Samoa.
O le foa’i tupe e sefulu afe ma masini o fesoota’iga e aofia ai se televise flat screen, o routers e maua ai fesoota’iga initaneti, o telefoni feavea’i, o se tablet ma pepa fafaga telefoni ta’i $100 tala.
O le aso 22 o le masina nei ua faatulaga e faia ai se sauniga e faamanatu ai le limasefulu tausaga o le faalapotopotoga sa amataina e nisi o le aufaasalalau ma tusitala i le malo ma le vaega tuma’oti, o nisi ua fai i lagi le folauga, a o nisi ua malaga ma faamautū i atunuu i fafo.
O i latou ua faamauina suafa na amatamea i le faatūina o le faalapotopotoga o le a faatino iai se fā’alo ma se faaaloalo i le aso o le a sami ai le iupeli auro o le faalapotopotoga.
O le sui pelesetene o le JAWS le susuga Seiuli Francis Vainalepa sa fai ma sui o le Komiti Faafoe o le faalapotopotoga e faafetaia le agalelei o le Vodafone Samoa ma momoli ai foi ma le faafetai i le Pule Sili o le kamupani ma le pulega.
