E lima matāgaluega a le malo ae lua faalapotopotoga tuma’oti i Samoa o le a galulue fua ai sui o le a galulue fua e leai ni totogi mai le atunuu o Ausetalia, i le polokalame fesoasoani a lea malo.
Ua faailoa e le ofisa o le malo o Ausetalia i Apia o le taimi muamua lenei talu mai le faama’i o le Koviti-19 ua auina mai ai se ulua’i aumalaga to’atele o tagata galulue fua poo volunteers e tufa atu o latou tomai a’oa’oina i nisi o auaunaga tuma’oti ma matāgaluega a le malo.
O le Matāgaluega o le Soifua Mālōlōina, Matāgaluega o Ālamanuia Pisinisi ma Leipa, Matāgaluega o Galuega Tetele a le Malo, ofisa o tausi mavaega, ma le ofisa o le Loia Sili a le malo o itutino ia o le malo o le a galulue ai nisi o le to’asefulutasi o alii ma tama’ita’i o tagatānuu Ausetalia e iai agavaa ma tomai a’oa’oina.
O le faalapotopotoga o tinā faipisinisi ma le sosaiete e vaaia le saogalemu o meaola o faalapotopotoga ia mai le vaega tuma’oti.
