Ua faamaonia mai nei e le Ofisa o Femalagaa’iga le faamae’aina o le galuega, o le tipoti ai o le tagata mulimuli o ē na solitulafono i totonu o Niu Sila.
O le galuega na faipaaga ai le Ofisa o Femalagaa’iga, o le Ofisa o Tiute ma le Auaunaga a Leoleo.
O se tasi o galuega tele a auaunaga o puipuiga a le atunuu na faatino e oo atu lava i le tausaga o faatautaia mai.
I tala’aga o lenei matāupu e faapea, o loo aofia ai le vaega tele ua ta’ua o le International Syndicate na taumafai e aumai faananā i totonu o Aotearoa fuālaau faasāina o le ‘aisa, o le cocaine, e oo atu lava i le $20 miliona tālā Niu Sila lona tauaofa’i.
Faamauina o ia ‘aisa na aumai faananā mai i totonu o se vaa la’u pusa oloa tetele poo containers.
E to’afā ni tagata ese poo nisi mai atunuu i fafo na saisai ma taofia faapagota e leoleo i Tauranga i le masina o Oketopa o le tausaga e 2017, ma na faasala mulimuli ane i le tausaga e 2020.
Ae i ripoti mai le Ofisa o Femalagaa’iga na faamaonia mai ai le tipoti ai nei o le tagata mulimuli na molia ma falepuipui.
O se tagatānuu Croatia, ma ua tipoti ona o ona aafiaga i soligatulafono faavaomalo o le tufatufaina ma le aumai faananā o fualaau faasāina ma tupe palapalā.
Faaalia e le Faatonu o le vaega o le Compliance Fadia Mudfar, o se matāupu faigatā tele ona o le to’atele o paaga mai fafo o loo aofia i lenei galuega, faapea foi tulafono a ia atunuu.
Ae e le’i faapea na vaivai ai le taumafai ina ia faai’uina ma le manuia lenei galuega tele, aemaise o le taunuu ma le manuia o i latou ua aafia i laufanua o o latou atunuu, e pei ona iai le alii Croatia lea na tipoti mulimuli atu nei.
Ta’ua o le isi to’atolu na aafia faatasi, o le to’alua o ni Ausetalia ma le isi o se tagatānuu Serbia.
Na tipoti uma ina ua mae’a ona tuli o latou faasalaga i le masina o Ianuari 2023 ma le masina o Setema o le tausaga 2024, ma Novema o le tausaga 2025.
Faamauina o lenei matāupu ua avea ma se ata faaaliali o le galuega faifai pea a auaunaga eseese a Niu Sila ina taofia le ofi mai i totonu o fualaau faasāina i le atunuu.
