Ua faaalia le faanoanoa tele o le Auaunaga o Leoleo i le faatupula’ia o le numera o tagata ua fano ola i luga o auala mai taavale lavevea, i totonu o le na o le 10 aso.
Ma o se tulaga ua matua’i latou saga faamausalī ma faamanatu mai ai lava le tāua o le saogalemū i luga o auala, ma le tatau ai ona ave ma le faaeteete o taavale i aso ta’itasi.
I se pepa o faamatalaga mai le Matāgaluega o Leoleo na faamaonia mai ai e le Ta’ita’i Leoleo Asiasi – Inspector Peter McKennie, o le Sui Faatonu o le auaunaga a leoleo i luga o auala, talu mai lava le Aso Gafua 21 o Mati na molimauina ai le maliliu o le oo atu i le 18 tagata, faamauina e 14 lavea na tula’i mai na afua ai ia maliu.
E oo mai i le taeao o le asō e 12 foi isi soifua ua ma’umau i luga o auala i totonu o Niu Sila, pe a faatusa atu i le piriota lava lenei i le tausaga ua mavae.
Na momoli foi faamaisega a le auaunaga i aiga ua mafatia ona o aafiaga ua feagai ma i latou, o mafutaga ua motusia faafuase’i.
Ua faamauina foi le faanoanoa tele o leoleo i tulaga o le to’atele tele o tagata ua fano ola ma o ni faalavelave sa lē tatau lava ona tupu pe ana faatumauina pea le faafoeina ma le faaeteete o taavale i luga o auala.
Ta’ua e McKennie, ua tatau ona taga’i ma le toto’a tagata i le tulaga ua iai le maualuga tele o numera o faalavelave e tutupu mai ma le faatupula’ia o ē ua fano soifua.
I faamaumauga a le auaunaga, mai le 16 o maliu e faapea sa fano ola ona o faalavelave na tula’i mai i luga o auala, e oo atu i le 100 kilomita i le itula le saoasaoa faatulagaina, ma o auala foi e lē o iai ni puipuiga faatulagaina mo taavale feoa’i.
Ua tuuina mai ai nei le fautuaga a le auaunaga o leoleo mo tagata femalagaa’i, o avetaavale ina ia faaeteete lava le feoa’i ai i luga o auala aemaise lava auala o loo maualuga kilomita o le saoasaoa faatulagaina mo feoa’iga.
Faailoa foi e leoleo, e lē ‘alo lava le auaunaga mai le faatinoina o a latou galuega māta’itū aemaise o le faamalosia o le tulafono i avetaavale uma e lē savalia aiaiga ma tulafono faatulagaina i luga o auala.
