A o faatalia le taunuuga o su’ega poo test i le tagofia o nakoti poo fuālaau faasāina mo le vasega o leoleo sinia i le Matāgaluega o Leoleo, Falepuipui ma le Toe Fuata’ina, o lea ua faailoa e le matāgaluega le taunuu atu o le taunuuga o su’ega sa faia mo le Sui Komesina ma lana pulega e leai se isi na faamaonia o aafia i fuālaau faasāina, mai lea su’ega sa faatino e le nofoaga o su’esu’ega faasaienisi le S.R.O.S.
Ua faailoa ai i se faasalalauga a le matāgaluega i lana upega tafa’ilagi o le faia o lea su’ega e faamautinoa ai le tulaga maualuga o le amio tausili ma le faamaoni o malu o le malo i le faatinoga o latou tiute.
E lē o faailoaina e le matāgaluega pe faafia ona faia ia su’ega i le tausaga, ae o le taimi muamua lenei ua faia ai lea tulaga e pei ona faamautū i se faiga faavae ua mae’a ona tapena.
