Ua amata nei sa’ili’iliga a le auaunaga a leoleo i se faalavelave mata’utia; i le mū ai o se fale i se tasi o nofoaga ua ta’ua o le Ruapehu Settlement i Rangataua.
Faamaonia na maua e leoleo le tino maliu o se alii 62 tausaga le matua e suafa ia John Alan Seymour i lea nofoaga a o faasolo a latou sa’ili’iliga.
Ua māua o lē ua maliu e onaina le fale na faatama’ia e le afi.
Ma i tulaga o lea matāupu ua iai le talitonuga o lenei mū e lē o se faalavelave na tupu fua ae o se faalavelave na tula’i mai ona o se gaioiga na faia ma le mautinoa.
A o faatino ai galuega a le auaunaga a leoleo i lea faalavelave, ae valaau ane le auaunaga o faalavelave tutupu faafuase’i i se isi o matāupu, o se lavea i luga o le auala o le State Highway 49 e latalata ane i Ohakune.
Ma i lea matāupu e faapea o loo aafia ai ni taavale se lua, ma ona o le tugā o lea lavea na maliu ai se alii e suafa ia Jason Savage e 35 tausaga le matua.
O le itu mata’utia i lea matāupu, o le alii o Jason Savage ua faamaonia e leoleo o ia lea sa aumau i le fale a le alii o John Alan Seymour – poo lē ua faaigoaina i le gagana Peretania o le “boarder” ma faailoa ai e leoleo le fesoota’i o ia faalavelave e lua.
Faaalia e leoleo su’esu’e faapitoa poo detectives lo latou galulue e sa’ili’ili le sa’o ma faamatalaga tonu o mea na tutupu ua afua ai le tula’i mai o ia faalavelave.
Ta’ua e uō ma ē na silafia John Alan Seymour, le suiga tele i le olaga o le alii, aemaise i le tulaga na aafia ai lona soifua mālōlōina.
O se tagata aupito i talenia ma agavaa i galuega faainisinia, o se tagata faipisinisi ma o sē na matua’i alofagia e le to’atele.
Faaalia le faatino ai o se sauniga e manatua ai lea alii e 62 tausaga le matua, ma e iai le talitonuga o le a to’atele tagata e aga’i atu mo lea faamoemoe.
Puna o Faamatalaga: https://www.rnz.co.nz/news/crime-and-justice/593150/man-who-died-in-car-crash-was-boarder-at-rangataua-house-where-body-was-found-burned
