O tupe totogi o lafoga a le aufaipisinisi o se fesoasoani lea i tupe maua mo galuega a le malo, e pei ona aoina e le Matāgaluega o Tupe Maua.
O lea auaunaga sa tuufaatasia muamua ma le ofisa o le tiute ma faatino ai mo le ulua’i taimi le polokalame faatekonolosi e ta’ua o le Tax Invoice Monitoring System poo le TIMS e māta’itū ai lafoga totogi i le malo a pisinisi, aemaise e māta’itū ai foi poo faamaoni pisinisi i lafoga o loo totogi.
O lea ua toe faaauau lea polokalame mo le isi lima tausaga ma ua ave ai le fautuaga a le ta’ita’i o le malo i le atunuu, ina ia tapa lisiti o soo se faatau ona o faamaumauga ia e mafai ai ona iloa le tau o loo faatau ai se oloa.
O le tāua o lea tulaga ona e mafai ai ona maua faamaumauga a pisinisi i tupe o loo latou maua ona fua lea iai o le lafoga e totogi i le malo.
O lipoti talu ai mai faamaumauga talu ona faatino lea polokalame sa siitia maualuga ai tupe maua mai lafoga totogi a pisinisi.
