Ua amata gasolo atu nei tagata e tuuina atu ni teu fugālaau i le nofoaga na tula’i mai ai se faalavelave mata’utia i Hastings.
I lenei matāupu ua faamaonia ai le maliliiu o ni tagata se to’atolu.
I ripoti mai le NZ Herald, na ta’ua ai le amatalia o su’esu’ega a le auaunaga o leoleo i le matāupu, ina ua logoina atu le vaega o faalavelave tutupu faafuase’i i se tasi o nofoaga i Avenue Rd East poo le itula e 6 i le taeao o le Aso Sa, i lipoti ua oo atu i ni tagata ua faamau’alia ma o loo i se tulaga ogaoga.
Faamanino e le ta’ita’i leoleo asiasi o se leoleo su’esu’e faapitoa, Detective Inspector Martin James, e oo atu lo latou ofisa i le nofoaga ua maliu se tasi o tagata, ae o le isi to’alua na avatu faatopetope i le falema’i mo togafitiga, ae na maliliu ai lava i se taimi mulimuli ane.
Faamaonia e leoleo, o i latou ua maliliu, o se tama’ita’i ma ni tamaiti laiti se to’alua, e ta’ua o ē e aumau i le fale poo le nofoaga na tupu ai le faalavelave.
Faamanino foi e leoleo e iai se alii na avatu i le falema’i mo togafitiga ma o le asō o loo fuafua e faatino ai se ta’otoga.
E tusa ai ma tulaga o lenei matāupu, ua faaalia e leoleo, latou te lē o sa’ilia nisi e fesoota’i i lenei faalavelave, ma e le’i faatinoa foi ni moliaga i le taimi nei.
E oo atu i le 30 tagata o loo galulue i lenei su’esu’ega ma o loo faaauau sa’ili’iliga i le asō.
Ta’ua e tuaoi, e uma lelei le Aso Toonai ma le Aso Sa, latou te le’i faalogoina lava se pisa mai le aiga, ae ua faate’ia i latou i ripoti tusitusia i le nusipepa na iai se faalavelave na tupu i lo latou tuaoi.
Puna o Faamatalaga: https://www.nzherald.co.nz/nz/woman-and-two-young-children-killed-in-hastings-flowers-laid-at-scene-as-police-confirm-new-details/DVZLCKH76NCKHMQU46LT43XWQA/
