O le fonotaga faavaomalo a atunuu Asia ma le Pasefika e aofia ai Samoa o loo i totonu o le li’o o malo o loo avea ma sui o le faalapotopotoga o faato’aga ma taumafa a le lalolagi le F.A.O., sa fofola ai e le Minisita o Faato’aga ma Faigāfaiva le afioga Fuimaono Maiava Tito Asafo le tulaga lata mai o loo iai le atina’e o faato’aga i Samoa faapea faigāfaiva, atoa ai ma le tulaga o iai tapenaga alualu mamao ina ia mautinoa ia lava i le tulaga gafatia, taumafa i lo tatou atunuu.
Ua faailoa i se pepa o faamatalaga e lē gata ina folasia ai e le minisita ia vaega ae sa ia faailoa ai foi ma lu’itau o loo feagai ma Samoa.
Sa ia faailoa ai foi gaioiga uma o loo faatino ina ia lava tapena lo tatou atunuu i lu’itau faasino i suiga o le tau ma ona aafiaga i le atinae o faato’aga ma faigāfaiva ma faiga faavae ua faataoto e lo tatou malo e faafetaia’i ai ia lu’itau.
Sa malaga le minisita ma le tama’ita’i Ofisa Sili o le pulega o le Matāgaluega o Faato’aga ma Faigāfaiva le afioga Afamasaga Taimalietane Matatumua.
Sa usuia lea fono faaletausaga i le atunuu o Brunei.
