Ua faapaleina nei le tama’ita’i o Faalagilagi Chan Fualau Tuisalega Farani e avea ma tausala o le Miss Global Samoa, ma ua amata ana tapenaga mo le tausiniō ai i le tauvaga tele e sa’ilia ai se tausala o le kelope e faia ia Setema o le tausaga nei i le atunuu o Thailand.
I le sefulu tausaga talu ai sa tauva ai i le sa’ilia o se tausala Samoa Niu Sila i le tausaga e 2012 ma ia ausia ai le tulaga o le 2nd runner up.
O le tausaga e 2014 sa tauva i le sa’iliga o se tausala o Samoa ma ia ausia le tulaga o le 4th runner up ma o se tauvaga na manumalo ai i le taleni o se tasi o vaega togia o lea tauvaga.
O le po o le Aso Toonai na te’a nei nei na faapale ai e avea ma Miss Global Samoa i se sauniga sa auai le afioga i le Ao o le Malo ma lana Masiofo, o le Sui Palemia ma le Minisita o Tagata Tafafao.
O le kamupani telefoni o le Vodafone Samoa o loo avea ma lagolago autū i tapenaga a Faalagilagi ma le Manaia Events mo le tauvaga o le Miss Global.
O le sauniga i le Aso Toonai na faamuta ai le avea o le tama’ita’i o Nicolina June Ah Kuoi ma tausala o le Miss Global Samoa.
