Ua teena e le Faamasinoga Faaitumalo le talosaga a le tama’ita’i Loia ia Magele Leone Su’a Mailo e faasee ese mai le tauaveina o le itu a leoleo i le matāupu poo le tagi a Asiata Pio Vaoliko faasaga ia Toleafoa Sai’a Toleafoa ma Ainuu Iliganoa Savaiinaea.
Na faaleo le talosaga a Mailo i le taeao analeila ma fesiligia ai loa e le Faamasinoga māfua’aga ma ia faailoa ai o lē o loo tagi ua lē fiafia ma ua fesiligia le faamaoni o lona faatautaiga o lana matāupu e lē gata i lea ua ia faapea foi o le tala a lē ua tagi e faapea o ia e iai lona sootaga i le vaega faaupufai o le HRPP.
E pei e foliga mai e manatu lava lē o loo tagi e fai lona finagalo ae faatuana’i le fautuaga a le loia o loo tula’i mo lana matāupu.
Sa teena e le tama’ita’i Loia ia Magele sona sootaga i le HRPP ma ua tele foi matāupu na te faatautaia e lē o faia i se tulaga faapea.
O se itu na matuā lē talia e le Faamasinoga ma faapea ai saunoaga a le tama’ita’i Faamasino, o le matāupu ua tuuina atu ai le talosaga a Mailo e teena, ma e faatumauina pea le avea o Magele Leone Su’a Mailo ma Loia e tula’i mo leoleo i le matāupu se’ia oo i lona faai’uga.
O ia o se tasi o loia sinia o le Faamasinoga o loo faia le tulaga talafeagai ma le tulafono i le Faamasinoga.
O le isi itu ua tele talosaga o loo tālia nei ma le faatautaiga mai o lenei matāupu e Mailo ma o ia e malamalama lelei iai.
Sa ia faamanino foi ua na o le Faamasinoga Maualuga na te vaavaaia le itu i le faamaoni o i latou ua ta’ua o Ofisa o le Faamasinoga (officers of the court).
E iai lona faatuatuaga ia Mailo na te faia lana galuega i le amiotonu, e pei foi ona faia i le tele o galuega ma matāupu na ia tauaveina muamua mo le itu a leoleo.
Ma poo ā sootaga o tagata o lana lena faitalia ae o le faatinoga o le galuega lenei e lē o vaaia se tulaga faapea.
Na ia faamamafa foi na te lē taliaina le faataga o lē ua tagi e faaali atu ona manatu ma faatonu atu, e lē o se tulaga aloa’ia lea o faatinoga o matāupu nei i le tulafono.
Sa ia fautua foi i le tama’ita’i loia ia Magele e ala i lana talosaga ua foliga mai ai ua ia faataga lē ua tagi e faatonutonuu le faatinoga o lana galuega, ma e pei e mana’o e fai lava le mea e fiafia ma manatu iai ma faatonu mai ai le loia o tula’i.
“That’s not how we done things in this court and you know that,” Afioga Alalatoa Rosella Papalii ia Magele Leone Su’a Mailo.
Na tāpā foi e le Faamasinoga le loia a le ofisa o le Loia Sili sa auai ia Maiava-Tele Timothy Fesili ma fesiligia i se finagalo o lea ofisa i le matāupu ua faatula’i atu.
Sa tali le loia mai le ofisa o le Loia Sili e lē māmā lana talanoa i matāupu i loia mai tua e tuuina atu iai le galuega e faatino e fai ma sui o le ofisa o le Loia Sili.
Ina ua tuuina atu lenei matāupu ia Mailo sa ala atu i se faagasologa na faia ma māta’itūina lelei.
E matuā lē fesiligia foi e lo latou ofisa le faamaoni ma le tulaga maualuga o le faatinoga o galuega a Mailo lea o loo vaaia I le tele o matāupu e tuuina atu iai e faatautaia.
E oo lava foi i le itu tetee sa faailoa foi le finagalo o Meleiseā Matthew Lemisio, sa ia faamalosi’au foi ia Magele ma lona auvaa i lenei matāupu.
O le asō na tolo mai iai le matāupu lenei ina ia tuuina atu ai talosaga a le itu a Toleafoa ma Ainuu e teena ai le faaaogāina o le video link e fai mai ai le molimau a Asiata.
E lē gata i lea o le la talosaga e tauala i le la loia e faalēaogāina moliaga faasaga ia i la’ua.
Sa faaulu uma atu e Meleiseā Matthew Lemisio ia talosaga.
O loo teena e le itu a leoleo le talosaga i le faalēaogāina o moliaga.
Ua faatulaga mai ai e le Faamasinoga le aso 14 o Me 2026 e iloilo ai ia talosaga ae o le asō o le iloiloga o le matāupu autū e fua lea i sana faai’uga i talosaga ia e iloa ai le faaauau ma le leai foi; afai e faaauau o le a iloilo mau i le aso 20 aga’i atu i le aso 22 o Me 2026.
O lenei matāupu o le tagi a Asiata Pio Vaoliko o se alii faasalalau i le polokalame o le Tautai A’e i luga o le Bluwave TV i Niu Sila faasaga ia Toaeafoa Sai’a Toleafoa ma Ainuu Iliganoa Savaiinaea, o se aufaasalalau i le polokalame Maota o Samoa Viiga o le Atua mai Ausetalia e tusa o ni tala na o la lafoina ua manatu lē ua tagi ua aafia ai lona ta’uleleia ma e solitulafono ia lafoga.
