Ua faamaonia mai i se sa’ili’iliga a leoleo lo latou maua ai o se faafitauli i tulaga o le tuuina o laisene o laaumalosi.
Faamauina i ripoti mai i ia sa’ili’iliga, sa iai se sasi i le faatinoga o lenei matāfaioi.
E oo atu i le to’asefulu tagata sa lē tatau ona taulimaina ni laisene, talu ai e iai soligatulafono na aafia ma molia ai.
Ma na faamaonia foi a latou soligatulafono, ae o lea sa tuuina iai laisene.
I ripoti mai le leitio faavaomalo a Niu Sila o loo ta’ua ai e Auaunaga a Leoleo o le atunuu, o lenei faaletonu, na maitauina le tula’i mai i le tuuina atu o laisene o laaumalosi i le masina o Tesema o le tausaga 2020 ma le tausaga 2025 i le masina o Oketopa.
E faapea na maua lea faaletonu ina ua faatino se tasi o sa’ili’iliga ua faaigoaina o le Quality Assurance Investigations Framework, o se fuafuaga na amata faatautaia mai ona o le aafiaga sa iai Kalaiesetete i le tausaga e 2019 ina ua maliliu ai tagata tapua’i Musalemi i o latou malumalu ina ua tafana e se tasi o alii faatupu faalavelave.
Ta’ua i le ripoti a le auaunaga, o soligatulafono a le to’asefulu e aofia ai le totōina o laau maruana, o le tufatufaina atu o fuālaau faasāina, o le faaoolima ma moliaga o le faiaiga faamalosi.
Faamanino e leoleo o le to’atolu o i latou nei ua agavaa nei e faaaogā pea a latou laisene o laaumalosi talu ai e oo ane i le taimi na iloa ai lea faaletonu ae ua silia i le 10 tausaga ua mavae na latou faia ai ia soligatulafono.
O le isi to’afitu na faamaonia, na vave ona faalēaogāina a latou laisene, māua le galulue foi o le auaunaga e toe aumai i totonu laaumalosi ma tuuina atu i tagata o loo faatulafonoina le umia o laisene o laaumalosi.
Faamanino e le Faatonu o Auaunaga – Director of Service Delivery, Matthew Boddy lo latou faanoanoa tele i se lape a lo latou auaunaga, ona o se matāupu sa lē tatau lava ona tupu.
Ma talu ai o ia tulaga o lea ua faatonuina ai nei e le Matāgaluega o Leoleo, le toe faia o a’oa’oga poo le refresher training mo sui o loo galulue i le tuuina atu o laisene o laaumalosi i le mamalu lautele, ina ia mautinoa o loo mausālī pea lo latou malamalamaga i ta’iala ma le māta’itūina o ē o loo iai soligatulafono, e lē tatau ona toe umia se laisene o laaumalosi.
Puna o Faamatalaga: https://www.rnz.co.nz/news/crime-and-justice/594245/gun-licences-issued-despite-disqualifying-convictions-police-check-reveals
