O se fuafuaga a le faigāmalo talu ai e toe iloilo le tulafono o loo faagaioia ai galuega a le Faletupe Tutotonu o Samoa, ua faaauau lea tulaga e le faigāmalo ua iai nei, e ui o nisi o tapenaga mo ni suiga e faaofi i lea tulafono ua fesiligia e le faalapotopotoga o tupe faavaomalo le International Monetary Fund poo le IMF, ona o loo atagia ai ni suiga e ono sao atu ai faiga faaupufai o malo poo polokiki i le pulea ma le faatonutonuina o galuega a le Faletupe Tutotonu le Central Bank of Samoa.
Ua faailoa i se finagalo o le tamālii sa avea ma Minisita o Tupe, le afioga Lautimuia Uelese Vaai i se faatalanoaga ma Tusitala, o suiga sa silasila iai i le taimi o le faigāmalo talu ai o le faaofi o ni aiaiga faaletulafono e mafai ai ona faatonutonu e lea faletupe le tului o nonōgatupe o loo faagaioi e isi auaunaga tau tupe e pei o auaunaga o loo faatino e pisinisi nonōtupe poo financial institutions.
Na mafua lea fuafuaga ona o finagalo sa laga e nisi o sui faipule i le paeaiga 17 a le Palemene sa latou fautuaina ai le malo e silasila i auaunaga ia ma tului o loo latou tapenaina ona o le isi lea o mafuaaga o mafatiaga ua feagai ma nisi tagata. Ua nao faletupe o loo faafaigaluega ai tupe a tagata poo commercial banks i Samoa o loo iai faatonutonu atu e le faletupe tutotonu tului poo interest rates.
Le afioga Lautimuia Uelese Vaai sa avea ma Minisita o le Matāgaluega o Tupe i le faigāmalo talu ai a le paeaiga 17 a le Palemene.
O le finagalo o lē sa avea ma Minisita o Tupe sa tāpā e tusitala ona o lipoti talu ai nei sa faailoa ai se finagalo o le IMF e ala i se tusi na tuuina atu i le Minisita o Tupe ma aumai ai se finagalo o le afioga Mulipola Anarosa Ale-Molioo.
Le tama’ita’i Minisita o Tupe le afioga Mulipola Anarosa Ale-Molioo.
