O loo faasolo pea galuega faatino a le faalapotopotoga a le ASA Foundation mo tagatānuu Samoa faapea le Pasefika i Niu Sila nei.
O nisi o ia vaega o le tali atu lea i tulaga faalesoifua mālōlōina.
O le faai’uga o le masina nei, o le a faatino ai se polokalame ua faaigoaina o le Pasefika Open Day, ua faatulaga lea mo le faia o tuipuipui o le flu, o tuipuipui o le Koviti-19 faapea ai ma tuipuipui o le misela.
I lenei polokalame o le a vaaia ai le faatinoina o ia tuipuipui mo tagata matutua ma fanau, faapea soo se tasi e iai gasegase tumau.
Faamauina o le a iai le tele o auaunaga i lenei Open Day, e pei o auaunaga a le tineimu, leoleo, galuega lavea’i a le Auckland Council ma nisi o sui o auaunaga faasoifua mālōlōina.
1. Asiasi i le fale’ie o le Hato Hone St John ma fesili mo Esther Tofilau Tevaga e alu ai lou suafa i le se’i (draw) e manumalo i le pusa pisupo.
2. Fai lou tui o le flu poo le koviti, poo le misela e le Pasefika Family Health Group e alu ai lou suafa i le se’i (draw) e manumalo ai i le ato o faatauga o taumafa.
3. E maua le taumafataga māmā mai le 10:30am – 11am mo i latou e vave atu.
O lenei polokalame o loo tauala mai i le faigāpaaga a le faalapotopotoga a le ASA ma le vaega a le Hato Hone St John.
O lenei Pasefika Open Day o le a faia i le aso 29 o Aperila 2026, ma o le a faia i le Manurewa Netball, 95 Browns Road, Manurewa, mai le itula e 10 i le taeao aga’i i le 2 i le aoauli.
