Ua faitau vaiaso o taofia pea le tama’ita’i Kiwi o Everlee Wihongi i lalo o le vaavaaiga a leoleo i Amerika poo le ICE detention centre.
O lea foi na tuuina atu ia tatou ripoti le tulaga o le taofia ai o lenei tinā Maori e aunoa ma se faamatalaga.
Ae peita’i o lea ua tuuina mai nei ripoti ma faasalalauga e tusa ai ma se faamatalaga mai le Minisita o le Va i Fafo, Vaovasamanaia Winston Peters, ua māfua ona taofia Everlee ona o lona lē faamaoni i se tasi o aiaiga i lalo o tulafono o lona lē faailoa ai o sana soligatulafono e pei ona iloa lava le tatau ai ona faaali manino i luga o pepa aloa’ia o le ulufale ai i totonu o Amerika, ma soo se atunuu lava.
Ae na faaalia e Everlee, o lenei soligatulafono na tupu i le silia ma le 10 tausaga talu ai ma o lona umiaina lea o se fualaau faasāina o le maruana.
Peita’i ua faaali manino e se tasi o faatonu, poo se consultant e feagai ma visa a tagata Niu Sila mo Amerika, e tatau lava ona faamaoni pea o tatou tagata Kiwi o loo umia green cards e faailoa ni soligatulafono sa aafia ai muamua.
Na fautuaina foi e Kevin Park, le moomia lava ona sa’ili fesoasoani i latou nei o loo alaala i Amerika i tulaga o aafiaga ma nisi o vaega e taga’i iai a o le’i faimalaga atu i fafo ma le atunuu.
O ā ni foliga vaaia e tatau ona o latou silafia i le toe taliu atu ai i totonu o Amerika.
Ta’ua e Park, e eseese lava auala e faatino ai tulafono o atunuu, ma pe itiiti le umiaina o le maruana i le vaai a le Niu Sila, ae e matua’i ogaoga i le vaai a nisi o atunuu e pei o Amerika.
Faaopoopo le alii faatonu, e lē o mailoa lelei faamatalaga i le iai o Everlee i lalo o le vaavaaiga a leoleo i le taimi nei, ma le tulaga e ono oo iai; ae na ia ta’ua o le lē faamaoni ma le lē sa’o o faamatalaga e tuu i pepa i le taunuu atu i le atunuu o se mea e matua’i faigatā i lona iloa.
O Everlee Wihongi ua silia ma le 10 tausaga o aumau i le Iunaite Sitete o Amerika, ma na faimalaga mai i Niu Sila nei e asia aiga, faapea le auai i se aso fanau a sona uncle i le masina talu ai.
O le toe taliu atu ai i Amerika na taofia ai o ia i le malae vaalele e le vaega a le ICE.
Puna o Faamatalaga: https://www.rnz.co.nz/news/world/593765/kiwi-green-card-holders-advised-to-be-upfront-about-previous-convictions-when-entering-us
