Ua faailoa lautele ai nei le faatulagaga faaletausaga o le tulaga o loo faafoe ma faatino ai galuega a tusitala ma le aufaasalalau i atunuu e 180 o le lalolagi, ma ua molimauina ai le matuā pa’ū maualalo o le tulaga o Samoa, e faatusa i le lima tausaga talu ai.
I le sa’ili’iliga sa faia e le auaunaga tuma’oti a tusitala o le lalolagi e ta’ua o Reporters Without Borders ua faatulaga ai Samoa i le 59, e tusa ua sefululima sitepu ua pa’ū maualalo ai e faatusa i le tulaga 44 sa iai Samoa i le tausaga ua mavae 2025.
O le tausaga e 2023 sa saofa’i Samoa i le tulaga 19 ae o tausaga i tua atu 2019 sa tulaga 22, 21 sa iai i le tausaga e 2022 ma le 2023 sa saofai i le tulaga 19.
Faaalia e le ta’ita’i o le Itu Agai sa tula’i i le tofi Palemia mo le 20 ma ona tupu tausaga, o se tulaga lē lelei ua iai Samoa i le faatulagaga ua faailoa lautele faasino i le tulaga o loo iai le faatinoga o galuega a tusitala ma le aufaasalalau i Samoa i le taimi nei.
O se finagalo o le ta’ita’i o le Itu Agai, susuga Tuilaepa L Sailele Malielegaoi i auala o fesoota’iga a le vaega faaupufai e puipuia aiā tatau o tagata.
