I le 80 tausaga talu ona ola le Taua Lona Lua a le Lalolagi, o le faamanatuina o le aso o fitafita o lea taua tele o le lalolagi i Samoa i lenei tausaga na faato’ā iloa ai se isi pine faamau o lea taua ma le sao o Samoa sa faatino ai.
Ua faailoa i se pepa o faamatalaga mai le vaega o le fitafita o le puipuiga a le malo o Niu Sila, o se tasi o ituaiga o vaaleletau sa faaaogā i le Taua Lona Lua a le Lalolagi e ta’ua o le spitfire sa faatau ma tusia ai le igoa o Samoa i Sisifo poo Western Samoa.
Na faatau lea vaalele i le tau e 5,723 pauni tupe Peletania, ae o pusafa’i uma sa fafao mai faato’aga fa’i i Samoa i lea vaitau o pulega a Niu Sila i lo tatou atunuu, e 6 pene pe sixpence na aveese mai ai i le tau o le pusafa’i e tasi ma maua ai le tau o lea vaaleletau laitiiti, ma e faapea mai le pepa o faamatalaga o le sao foi lea o faifaato’aga fa’i a le atunuu sa iai i na onapo.
O se tasi o tama’ita’i fitafita o Niu Sila o Brigadier Esther Harrop sa malaga mai ma ata o le vaalele sa faatautaia e se fitafita, o se tamafanau a Samoa mai Lotofaga le alii satini o Flight Sergeant Andrew Kronfeld ma tauaao i le pelesetene o le sosaiete a fitafita Samoa le Returned Service Association poo le RSA e avea ma pine faamau o lea sao o Samoa i le Taua Lona Lua a le Lalolagi ma le auai o le fitafita a Niu Sila i lea taua tele o le lalolagi.
Faaalia e lea tama’ita’i fitafita i le feiloaiga ma le pelesetene o le RSA le afioga Tuala Iosefo Ponifasio, o le tausaga e 2015 na ia faato’ā iloa ai le tala o le vaaleletau laitiiti ma le sao o le ‘au faipusafa’i i Samoa i le faatupeina.
