O le finagalo o le Kapeneta i sana fonotaga ia Setema o le tausaga ua mavae ia toe totogi e le malo tupe uma a le aiga o le Palemia na faaalu i lana siiga gasegase muamua, peita’i ina ua toe taliu i fanua ia Novema o le tausaga lava ua mavae, sa faamautū ai e le Palemia ua mae’a ona totogi uma ma e lē finagalo ai e toe faaola atu le totogiina o ia tupe e le malo.
O le faamatalaga lea mai le ofisa sooupu o le malo e tali atu ai i ni lipoti ma faasalalauga o loo faailoa ai sa toe totogi e le malo le tau o le vaalele faapitoa e ave ai gasegase ma togafitiga uma ma siaki faafoma’i o lea siiga gasegase.
Ua faailoa foi e le ofisa sooupu o le malo e lē o iai ni faamaumauga e faamaonia ai sa toe totogi ma faaola ia seleni.
Ae i le siiga gasegase a le ta’ita’i o le malo i le masina na te’a nei o le ogatotonu o le vaiaso ua mavae na toe faaolatia ai i fanua le Palemia ma sa totogi uma e le malo vaega uma e aofia ai le vaalele faapitoa e ave ai gasegase sa malaga ai i Niu Sila faapea ma siaki faafoma’i.
