I le lua lenei o vaiaso o su’esu’eina i luma o se laulau o faatonu molimau o le faamasinoga o le tamā o Pokati Tuu poo Pokati Faatauī, o lea ua mae’a fofogaina mau a leoleo ma mau tetee a lē o loo molia i le solitulafono o le fasioti tagata faamoemoeina, na fano ai le soifua o se alii leoleo satini ma se tamā o le nuu o Nofoalii.
O le Aso Tofi na tuuina atu ai folasaga ma finauga faai’u a loia a leoleo ma le loia o loo tula’i mo Pokati, ma o le Aso Faraile ua taualuga ai i le saunoaga faai’u a le tama’ita’i faamasino o loo feagai ma lea faamasinoga le afioga Leutele Niava Mata Tuatagaloa, ona taoto atu ai lea i le laulau o faatonu mo le latou iloiloga ma se faai’uga.
O loo tetee lē ua miolia i moliaga uma a leoleo, ae o le alii leoleo satini o Peniamina Perite ma le tamā 40 ma ona tupu tausaga na fano ai o la soifua i se gaioiga o loo tuua’ia ai Pokati i lona faaaogā o se laaumalosi.
Ua tausaga ma masina e fitu o nofo taofia pea i le vaaiga a leoleo lē ua molia i le faia o lea solitulafono.
