Ua valaau nei le Childfund NZ mo se tali a le lautele i le matāupu i fuālaau faasāina ua faateteleina pea ona aafiaga ma le feavea’iina faasolitulafono i le Pasefika.
I se pepa o faamatalaga i le vaiaso nei ua faailoa ai e le Ofisa Sili o le faalapotopotoga Josie Pagani, o le matāupu lenei i le feavea’iina o fuālaau faasāina o loo tuu ai le fanau i se tulaga lamatia.
Fai mai a ia ua tatau ia Niu Sila ona silasila i tua atu o ona tuaoi ina ia fesoasoani i atunuu Pasefika ua oo atu i o latou laufanua ma matāfaga, fuālaau faasāina.
Ua faia ia faamatalaga i le mae’a o lipoti a le aufaasalalau aemaise le ABC e faatatau i le avea ai o le Pasefika ma se nofoaga ua faatō’ai atu iai fuālaau faasāina mai atunuu mamao ma le faamoemoe e ave atu ia fuālaau faasāina i atunuu e pei o Ausetalia ma Niu Sila.
O le masina talu ai i le faigāmalaga a le Palemia o Niu Sila, Christopher Luxon i le Pasefika e aofia ai Samoa ma Tonga, na ia faamautūina ai e moni o loo feagai ia atunuu ma faafitauli i fuālaau faasāina ma ia faailoa ai, o se faafitauli ua tatau ona tagofia.
Puna o Faamatalaga: https://www.rnz.co.nz/news/pacific/593577/pacific-drug-smuggling-puts-children-at-risk-warns-non-profit
