O le faai’uga o lena vaiaso na taia ai le tapua’iga a Samoa i se tala faanoanoa ma faavauvau ona o nisi o tinā, o le tasi sa tautua i le malo i ona tomai faafaia’oga ma isi auaunaga mo le tele o tausaga, ae o le tasi o se tinā faipisinisi lauiloa.
O le afioga Gatoloaifa’ana Dr Tilianamua Toomata Afamasaga o se tinā sa iloga lona sao i le galuega faafaia’oga lea sa oo ina avea ma uluai tama’ita’i o le atunuu na faauluulu iai le a’oa’oina o le tomai faafaia’oga i le Iunivesite Aoao o Samoa i ni tausaga ua mavae.
E silafia o ia e le to’atele i tausaga sa tautua ai i le malo i lea tomai sa amata a’oa’oina ai i nisi o kolisi ma iunivesite i Niu Sila ma Ausetalia.
O le tausaga e 2022 na filifilia ai o se tasi o sui o le Komisi e Pulea Tagata Faigaluega a le Malo poo le PSC ma sa tele ai foi lona sao i le siitia o auaunaga a tagata faigaluega a le malo.
O ia le ulua’i Pelesetene o le faalapotopotoga a tagata faigaluega i le malo ma le vaega tuma’oti le Samoa Workers Congress.
O le tausaga e 2022 na faaee atu ai e le Iunivesite Aoao o Samoa i le afioga Gatoloaifa’ana Dr Tilianamua Toomata Afamasaga le faailoga taualoa o le Honorary Doctorate of Letters, ae o le tausaga e 2023 na amana’ia ai e le malo lana tautua i le faaeeina iai o le faailoga taualoa o le Companion of the Orders of Samoa.
O le tinā o Lote Chan Mow ua lauiloa i le atunuu i le auaunaga tau pisinisi e pei ona silafia i le kamupani o Amau mo le tele o tausaga lea na amata faagaioi i le tausaga e 1950 se’ia oo mai lava i le taimi nei.
O ia o se tinā sa iloga lona sao ma lona to’alua ma ona alo auā e to’atele sa galulue ai e oo mai lava i nei aso o loo faafaigaluega ai pea le to’atele i le pisinisi ua tauave ma faaauau e ona alo ma a latou fanau.
E maliu le tinā o Lote Chan Mow i le Aso Tofi ua mavae ua atoa le masina talu ona ia aulia le selau tausaga o lona soifua.
