O faamaumauga lata mai a le vaega o loo feagai ma le polokalame o atina’e mo le manuia o tagata o itumalo faapalota e 51, lea o loo i le vaaiga a le Matāgaluega o Tinā ma Tama’ita’i, Atina’e o Afio’aga ma Aga Fesoota’i, ua faailoa ai le oo atu i le 160,354 le aofa’i o tagata o le tatou atunuu ua maua a latou ta’i $150 tālā o le fesoasoani o le Toe A’e o A’oga.
Ua faaaluina ai se vaegātupe e tusa ma le 24 miliona 53 afe ma le 100 tālā, peita’i o loo faaauau pea ona tuuina atu seleni o lea fesoasoani mai le malo, o lona uiga e le’i mae’a.
O le itupa o alii ua faamauina le aofa’iga e 80,904 ua maua le ta’i selau limasefulu tālā, o le ituvai o tama’ita’i ua 79,450.
O matua tausi poo tamā ma tinā matutua ua aulia ma sili atu tausaga e 65 ma ua maua le faamanuiaga o le penisione e to’a 9,495 ma tagata e iai aafiaga tumau e 1,931.
I le faavasegaina o tagata ua maua le fesoasoani lenei o latou matutua poo tausaga, o pepe faato’ā fananau e oo i fanau ua atoa le 4 tausaga le matutua e 19,492; o fanau mai le 5 tausaga e oo i le 12 tausaga le matutua o loo i a’oga tulagalua e 34,788; o fanau mai le 13 tausaga e oo i le 18 tausaga le matutua o loo i a’oga maualuluga e 22,524; ma fanau i a’oga o matātā eseese ma iunivesite e 13,584.
O tagata matutua mai le 25 tausaga e oo i le 34 tausaga le matutua e 18,616; o i latou o le 35 tausaga e oo i le 44 tausaga le matutua e 15,447; o i latou o le 45 tausaga e oo i le 64 tausaga le matutua e 26,408; ma i latou o le 65 tausaga ma sili atu e 9,495.
O le masina o Mati na amata faamatuu atu ai le fesoasoani tupe mo le toe a’e o a’oga uma i le atunuu.
