O se tala faanoanoa le oo mai ai o faamatalaga i le tau sa’ilia o se tamā Ueligitone, na leiloa mai i lona fale na aafia i lōlōga tetele, e pei ona fetaia’i ai Ueligitone ma aafiaga loulouā o le tau.
O Philip Sutton e 60 tausaga le matua na faamauina le leiloa mai i faaitu o Karori, a o feagai lea itu ma uiga loulouā o le tau, e pei ona aafia ai i timuga mamafa ma lōlōga tetele.
I nisi o ripoti mai le NZ Herald, na faailoa ai na logoina sui o faalavelave tutupu faafuase’i, le Emergency Services e le aiga o lea tamā poo le kuata e te’a ai le 7 i le taeao.
Ina ua maua atu le fale o Philip ua faaleagaina uma i lōlōga.
Ta’ua le tele o taavale leoleo na iai i le nofoaga, molimauina ai foi le tele o laau pa’ūū i luga o auala.
Faaalia e le sui o le itumalo, e faitau itula o galulue auaunaga e faamamā ma aveese le tele o otaota i le fale ma taumafai e sa’ili le tamā ae pagā lea, e le’i maua o ia.
Faamauina e sui o auaunaga le faigatā ai o le galuega ona o le mata’utia tele o le tau, ma o le a faaauau ona faatino sa’iliga pe a tau iai sina masele o tulaga loulouā o le tau.
Lipotia foi e le NZ Herald le oo mai o ata i tulaga pagātia o foliga o le fale a Phillip Sutton, ma o ni vaaiga faanoanoa le matua’i ogaoga lava o foliga o le fale ua faaleagaina.
Puna o Faamatalaga: https://www.nzherald.co.nz/nz/metservice-red-warning-for-wellington-rain-as-flooding-threat-grows/PZ47UUM4ARGZHE2RKOWT7STD4Y/
