I le oo mai ai o faasalalauga i le filifilia o lē ua seei mai e avea ma ta’ita’i o le Ekalesia Aoao a le Katoliko i le lalolagi, ua faailoa ai e sui o le Ekalesia i Niu Sila nei lo latou agaga fiafia tele ma o se taimi e vivii a’e ai i le Alii i le tala ua oo mai.
O lē ua filifilia e Katinale mai itu e fia o le lalolagi, e suafa ia Robert Prevost, 69 tausaga o lona soifua, ma i le filifilia ai o ia e avea ma Pope o le Ekalesia, ua faasuafaina ai nei o ia, ia Pope Leo XIV.
E faitau afe tagata na potopoto atu i fafo o le St Peter’s Basilica, i le Vatikano, ma na molimauina ai le lolofi atu o tagata ma faalogoina le alalaga faaalia lo latou fiafia tele ina ua aga’i atu le Tamā Paia e feiloa’i atu i lafumamoe.
O Prevost na soifua ane i Chicago Amerika, ma o se talafaasolopito foi lea i le lalolagi, le filifilia ai o se tagata Amerika e seei mai i lea tofiga maualuga.
I le saunoaga aloa’ia a le Tamā Pope i le amatalia ai o lana tautua i le ekalesia na ia saafi ai Pope Falanisisi mo lana tautua ma lona sao i le to’atele.
Na faaauau foi lana saunoaga e ala i le tuu atu o se faamalosi‘au i tagata faatuatua uma, ina ia faaauau folauga e aunoa ma le fefe.
Sa maitauina foi lona toe faamanatu ai o upu faalaei’au a Falanisisi.
I tala mai le ta’ita’i o Amerika, na ta’ua ai e Donald Trump, o se taimi fiafia ae o se tofiga aupito i tāua tele lea mo le atunuu.
Mai se tasi o tagata faasalalau Katoliko, o loo iai i le Vatikana, na ia faamatalaina ai o le tamā Pope ia Leo XIV o se tagata agamalū ma le alofa i tagata, ma o sē e iai lona naunauta’iga i sootaga lelei ma tagata lautele.
Puna o Faamatalaga: https://www.newstalkzb.co.nz/on-air/mike-hosking-breakfast/audio/jo-mckenna-italy-correspondent-on-the-election-of-robert-prevost-as-pope-leo-xiv/
