Ua faailoa mai i le lipoti lata mai o le fonotaga a ta’ita’i o le Pasefika i Fiti, ua faalauiloa nei se fuafuaga alualu mamao a le Forum e agai i le faafetauia o lu’itau o loo feagai ma tagata Pasefika i le taimi nei ma le agai atu i le lumana’i.
Lipotia e le RNZ Pacific o le 2050 Strategy for the Blue Pacific Continent ua ioeina uma e ta’ita’i o faigamalo sa auai atu i le fonotaga i Suva. O le visiona poo le mau tauave a lea fuafuaga ua ta’ua ai e mana’omia se Pasefika e filemu, malupuipuia, nofo lelei ma manuia ona tagata.
Saunoa ai ma le ta’ita’ifono o le Forum ma le Palemia foi o Fiti Sir Frank Bainimarama, o lea fuafuaga e faatatau i o tatou tagata. It’s about who we are i le gagana Peretania. E 36 itulau o lenei taumafaiga ua faataoto ai commitments poo ta’utinoga autu e 10 e tatau ona tausia lelei mo le manuia o le itulagi i le agai i le lumanai.
Ua ta’ua i le lipoti ua malilie Niu Sila ma Ausetalia e fai o la sao i le faataunuuina o le Suva Agreement ma ua malilie uma foi ta’ita’i o le forum e tatala pea le avanoa mo Kiripati i le maliega lea ma faamaonia foi e le Palemia o Niu Sila sa fesoota’i lava le ta’ita’ifono o le forum ma Kiripati i le tulaga ua iai le fonotaga.
Ua mae’a ai ma le fonotaga ae o le strategy e pei ona faataatia nei, le Blue Pacific ua faaalia e faatatau i tagata Pasefika, o latou faatuatuaga, aganuu ma agaifanua.
