Ua mae’a i le Aso Toonai na mavae nei le fonotaga a Ulu o Malo o le Taupulega e pei ona usuia ai i Samoa nei.

O le aoauli o le Aso Toonai na faia ai le fonotaga mulimuli ma tusitala faapea le ‘aufaasalalau i le faletalimalo o le Sheraton i Mulifanua ina ia manino i le tulaga o loo ua taatia mai ai mataupu ma i’uga sa mafai ona oo iai galuega a le fonotaga. 

E lē o toe po malaē i le faailoa mai e aumalaga a atunuu eseese lo latou agaga fiafia, ma le faafetai aemaise le maofa i le taligamalo a Samoa.

Sa fesiligia le Tamaitai Palemia o Samoa Afioga Fiame Naomi Mataafa i tulaga autū, ua mafai ona ausia e Samoa mai lenei faamoemoe sa alo atu iai.

Na ta’ua e Fiame mo le Pasefika lava ia o tulaga tau i suiga o le tau o loo faamamafa lava ona o le aafia ai o le soifuaga ma le ola o tagata, o le aogā lea o le aga’i mai o  Malo o le Taupulega i Samoa se’i o latou vaaitino i le tulaga o loo tatou ola ma soifua ai i lu’itau eseese o suiga ogaoga o le tau, o se mataupu e lē o mapu ai le tau’alaga a Samoa i le tele o fonotaga faavaomalo, peitai o i tatou ua na o ni atumotu laiti,  ae o le oo mai ai o ulu o Malo o le Taupulega i Samoa i le fonotaga lenei ua faalolotoina ai lo latou malamalamaga i le tulaga o loo lē mapu ai lea tau’alaga.

Ae i le taligamalo a Samoa na saunoa le Tamaitai Palemia ua faailoa le agaga fiafia o atunuu na auai mai.

Na ia ta’ua o se tasi lea o tulaga o loo tatou taumafai e faatino ona o le tele lava o taimi e faapea mai o atumotu laiti e le lava alagaoa i itu tau seleni poo tagata fo’i ae ua manatu ua mafai ona tatou faailoa atu i Malo o le Taupulega o le tulaga tonu faalenatura lea o le ola fetāla’i ina ua taumafai e faaaogā mea ua maua i ou lava lima e faaauauina ai le ola, ma faatumauina le faamoemoe mo le lumana’i.

Ma o se tulaga tāua le taumafai, e ui i lu’itau uma ae o loo tula’i atu atumotu laiti ma taumafai e aumai le lalolagi i nofoaga o loo tatou ola ai ma faailoa atu iai le auala o loo tatou taumafai ai e faatonutonufolau le soifuaga faatasi ma faafitauli o loo tatou feagai ai.

O loo faatonutonu folau foi faatasi ma le lagolago mai a tatou paaga faavaomalo o i latou ia e tāua tele i atumotu laiti.

Saunoa Fiame i la tatou taligamalo sa faia lava la tatou tu ma le aga faasamoa e logo atu i tagata uma e aufaatasi mai, ma e aga’i tonu lava le tagata ia i lana matafaioi, ma o le tali mai e ala i le viia o lenei faamoemoe o se tulga lelei lea.

Na ia ta’ua fo’i sa faapea mai foi nisi o le fonotaga lenei o se faamoemoe ua telē tele mo se atunuu e iai Samoa, peitai sa ia faapea atu e moni, ae o le autū lava o le fonotaga.

Na faailoa e le Tamaitai Palemia o le Ta’ita’ifono foi lea o le Komiti mo tapenaga o le Fonotaga ia te ia lava ia o se ta’ita’ifono o lana lea faamuamua, o tulaga uma e mana’omia le ausia e ala atu lea i le pulega lelei, o feutaga’iga, ma fatinoga sa faia.Ma o tulaga ia ua tatou mafaia ma ausia ai faamoemoega uma i la tatou taligamalo.