Ua avea nei le auaunaga a le kamupani e gafa ma faiga faapisinisi tau tupe le Federal Pacific ma lagolago autū i le pulega o le Lakapi Samoa mo le isi lua tausaga i le tau e 3 miliona tālā.
O se fesoasoani malosi lea ua maua e le Lakapi Samoa mai se pisinisi i totonu o Samoa lea ua faamoemoe e lē gata e atina’e ai le lakapi i ona vaega eseese ae aofia ai foi ma tapenaga a le aulakapi a le atunuu le Manu Samoa i le Ipu o le Lalolagi i le tausaga fou 2027.
O le afiafi o le Aso Faraile na te’a nei na faalauiloa ai i se sauniga i le faletalimalo o le Taumeasina Island Resort le lagolago a le Federal Pacific ma faailoa aloa’ia ai le amataina o le taamilosaga lakapi a iuni faaitumalo i Samoa.
E lē gata e tolu miliona le tau atoa o lea lagolago ae ua aofia ai ma taavale fou o pikiapu ma se van laitiiti e fesoasoani i galuega faatino o le atina’e o le taaloga lakapi.
Ua lolomi i togiga taalo a le Manu Samoa ma le Manusina faapea isi aulakapi faavaomalo a le atunuu le igoa o le FedPac e faalauiloa ai le kamupani i soo se taaloga lakapi e tausiniō ai Samoa.
