O le tamā talavou ia Setu Alapati o loo molia i le faalavelave tau taavale na maliliu ai ni tamaitai se toalua e aofia ai ma lona toalua ua ia ioeina moliaga o le ave taavale faatamala ua manunua ai ni tagata.
Peitai o loo ia tetee i moliaga e fa e aofia ai le solitulafono o le ave taavale faatamala ua afua ai le maliu, o le solitulafono o le fasioti tagata pa’ivalea e mafua mai i se faalavelave tau taavale.
O le toalua o lē ua molia o se leoleo o le Mālō ma o le aso faamanatu malu o le Mālō i le vaiaso na tea nei na manatua ai o ia i lea sauniga faatasi ai ma isi leoleo e toafitu sa tautua i le galuega ua fai i lagi le folauga.
O le tulai o Setu i le faamasinoga i le amataga o lenei vaiaso ua tuuina atu ai e lana Loia lana tali Ioe i moliaga e tolu ma lana tali tetee i moliaga e fa ma ua faatulaga ai o le masina o Me o le tausaga fou o le a suesue ai moliaga ua ia teena .
E pei ona silafia o lenei faalavelave tau taavale lea na tulai mai i le aso Toanai a’o loma ai le aso faapitoa mo tamā i Samoa i le masina o Aukuso. O se tasi lea o faalavelave tau taavale mai i faalavelave e tele na tulai mai i le atunuu i le tausaga nei ua maliliu ai ni tagata.
