Sa toe valaaulia atu tagata faatau i le supamaketi a le Countdown i Dunedin i le taeao ananafi, i le mae’a ona maua ai o ni isumu i le silia ma le lua vaiaso talu ai.

O le supamaketi a le Dunedin South Countdown, sa tapunia ina ua maua ai isumu i le amataga o le masina nei.

E ui lava sa uluai faataoto e tapunia i le na o le 48 itula, ae sa faaauau ona fai ma toloia le toe tatalaina, ona o le tele o isi isumu sa fai ma maua ai.

O se upega tuai e pue ai isumu sa maua i totonu o pa puipui o le nofoaga, e tusa ma le 26 isumu sa maua ai talu mai le aso 10 o Fepuari.

I le taeao ananafi, sa faaalia ai e le faatonu o faleoloa a le kamupani a le Woolworths New Zealand, Jason Stockill, o le a toe tatala ai le supamaketi.

Sa ia faafetaia ai tagata faatau i le onosai i le lua vaiaso ua mavae.