Ua toe taliu i le Aso Toonai na mavae nei le Tupu o Peretania lana Maiesetete Salesa III o ia foi lea o le faauluuluga o malo o le Taupulega ina ua maliu ai lona tinā o lē sa se’ei i le nofoalii o le aigatupu o Peretania i tausaga e tele ua mavae.
E toe tuuvaa ese atu le Tupu ma lana Masiofo ua mae’a faae’eina suafa matai mai nisi o afio’aga i Samoa nei e pei ona faasuafaina ai ia Tui Taumesina e le afio’aga o Moataa i le Aso Faraile ua mavae, atoa ai ma le suafa o le Toaiga-o-Tumua na faaee iai e le Itumalo o Siumu i nai itula lava a o lei toe malaga atu.
Na faailoa e le itumalo o Siumu le uiga ma le mafuaaga o le suafa ua faasuafaina ai le Tupu e afua mai lea i le suafa Tofaeono.
O le Afioga Tofaeono Meaalofa Salamasina na ia faaee atu lea suafa i le Tupu o Salesa III.
E lei mafai e le mamafa o uaga i le taeao o le Aso Toonai ua mavae ona taofia ai le polokalame a le itumalo o Siumu mai la latou faatali aemaise o le faaaloalo maualuga.
Na faapuupuu le polokalame ona o le taimi ua atofa e toe foi ai le malaga, ae sa tapena le itumalo i faafiafiaga ma tauaaoina foi meaalofa auā le faigamalaga.
O le malelega a le Tupu o Salesa ma lona mana’o ia umi lona soifua e toe maua ai le avanoa e asiasi mai ai i Samoa ma lona itumalo o Siumu.
