Ua amata le fono faaletausaga a le Ekalesia Faapotopotoga Kerisiano Samoa i Malua i lenei vaiaso i fonotaga masani a komiti e tapena ai matāupu mo le fonotele i le vaiaso fou.
Ua tumutumu ai le laumua o le ekalesia EFKS i usugafono mai atunuu e pei o Ausetalia, Niu Sila ma Amerika.
O le tausaga nei e pei ona masani ai o fonotele mulimuli mo nisi o faafeagaiga o le a mālōlo penisione, ae faapena foi i nisi o faifeau o loo umia tofiga o le laulau o le fonotele ona ua valaauina mo le tausia o aulotu.
O le tasi lea o fono faaletausaga e tau sa’ili ai avanoa i malaga a vaalele ona o le to’atele o usugafono e malaga mai mo le fonotele, ma e faapena foi i taimi e usuia ai nisi o fono faaletausaga a nisi o ekalesia e pei o le koneferenisi a le Ekalesia Metotisi e usuia i le masina o Iulai o tausaga ta’itasi.
