Ua faailoa e le tinā o Everlee le fesuisuia’i o setete o loo ave iai e le vaega a le ICE si ana tama teine, ma ua avea ai ma tulaga ua faafaigatā ai ona faagaioi ma faatino vaega uma o lana matāupu.
Mo le silafia o Everlee Whiongi ua atoa nei le masina talu ona taofia e le vaega a le ICE i lalo o le latou vaavaaiga i lona toe taliu atu i Amerika, i le mea o loo aumau ai.
Ta’ua e Betty Whiongi le tinā o le tama’ita’i o Everlee, na aveese atu lana tama mai se detention centre i Kalefonia i le vaiaso talu ai, ma na faia lava e aunoa ma se faailoaina i lana loia, ma o ia faiga na lē maua ai e Everlee le aso ma le taimi sa tatau ona feiloa’i ai ma loia mo lana matāupu.
Ae i faamaumauga a le ICE e faapea o loo iai le tama’ita’i o Everlee i se tasi o nofoaga poo se detention camp i Texas, a o le’i alia’e mai le faafitauli o le lē toe maua ai o le igoa ma faamaumauga o lea tama’ita’i Maori mai luga o le itulau a le ICE e masani ona māta’itū ai le tama’ita’i.
Peita’i na faailoa ane i le aiga o loo taofia le tama’ita’i o Everlee i se nofoaga o loo i le malae vaalele i Arizona ae e iai le talitonuga ua aveese mai foi i lea itu.
Faaalia le faanoanoa tele o le tinā ia Betty ona, na ia ta’ua o le fai ma aveese o Everlee o le a faigatā ai lava ona faatino galuega i lana matāupu, aemaise o le eseese o tulafono a lea setete ma lea setete, ma lē mafai ai e si ana tama ona aga’i e tula’i i luma o le faamasinoga ona e oo atu i le taimi e tatau ai ona tula’i ae ua leai foi.
Ua aga’i atu nei le aiga o le tama’ita’i o Everlee Whiongi i le Matāgaluega o le Va i Fafo a Niu Sila, ma le alii minisita, Winston Peters e sa’ili iai se fesoasoani, i ni faamatalaga e tusa ai ma le matāupu a Everlee.
Faaalia e le Matāgaluega a le MFAT, o loo fesoota’i pea ma le aiga ma taumafai e faasoa atu iai tulaga ua oo iai lea matāupu, ae ua o latou ta’ua e leai so latou malosi’aga e suia pe faalavelaveina ai faai’uga o femalagaa’iga a se isi faigāmalo.
Puna o Faamatalaga: https://www.rnz.co.nz/news/world/594891/ice-detainee-everlee-wihongi-being-moved-to-another-state
