I tala lata mai i le pepesi ai o le faama’i o le Hantavirus, o lea ua lipotia le toe foi ai o le pasese na i luga o le MV Hondius i o latou atunuu, ma o le a faanofoesea ai mo se taimi.
Faamauina e silia ma le 20 atunuu e aumau ai le pasese.
I ripoti na māua ai le taula o le vaa la’upasese poo lea meli i le Canary Islands i le vaiaso talu ai, ina ua taofia faafuase’i lana malaga ona o aafiaga i le soifua mālōlōina, talu ai le pepesi o le faama’i o le Hantavirus i luga o le vaa.
Māua le faia ai o puni fofoga ma ofu e puipuia ai mai le ono pesia i le faama’i.
E to’atasi se tagata Kiwi na iai i luga o le meli, lea ua faamaonia mai le faimalaga ese mai ma tagatānuu Ausetalia e to’alima, ma o loo māua le malaga ane i Netherlands a o le’i aga’i ese mo se tasi o nofoaga e lata ane i Perth e faanofoesea ai i le Bullsbrook Centre for National Resilience quarantine facility.
Faamanino e le Minisita o le Soifua Mālōlōina o Ausetalia, Mark Butler o le a faanofoesea e oo atu i le 3 vaiaso poo le 21 aso, ma e faapea e aofia ai ma le taimi o loo faailoa e iloa ai āuga o le faama’i, ia mautinoa ai le aafiaga o i latou na malaga atu.
Faamauina foi, o lea ua mae’a ona fesoota’i atu le Matāgaluega o le Soifua Mālōlōina a Niu Sila nei ma le tagatānuu Kiwi ma o le a faatautaia uma siaki ma iloiloga faatulagaina a le WHO i lona taunuu mai ai i laufanua.
I faamaumauga lata mai le WHO, e to’atolu pasese a le meli o le MV Hondius ua maliliu mai le faama’i ma e to’aono ua faamaonia le aafia i le vairusi, ma o loo faanofoesea pea.
E to’atasi se tama’ita’i Farani na faamaonia lona aafia i le Hantavirus o loo taofia i le potu tigāina, intensive care unit i se tasi o falema’i i Pale, ma ua amata ona sologa manuia.
Ae faamauina o isi tagatānuu Farani e to’afã ua mae’a iloiloga ma ua faamaonia e lē o aafia, ae peita’i o loo faanofoesea pea i latou nei.
I Amerika, e to’atasi se pasese na faamaonia lona maua i le faama’i, ae e lē o vaaia ni āuga o lea vairusi, ae o le isi pasese o loo faamauina le aafia ae e lē o iai i se tulaga tigāina, o loo faasolo pea togafitiga.
E to’asefuluono tagatānuu Amerika na avatu i le tasi o falema’i tuma’oti, le University of Nebraska Medical Center, e faanonofoesea ai ma faia o latou togafitiga.
Ae o le isi ulugalii Amerika na avatu i le Emory University Hospital, ma e faapea e to’atasi o loo maua i aafiaga o le ma’i ae e lē o iai i se tulaga tigāina.
Faaalia e le WHO o loo maualalo lava le tulaga e ono pepesi ai le faama’i i le lautele, ma ua o latou faamauina o lenei faama’i e lē pei o le Koviti-19.
Puna o Faamatalaga: https://www.1news.co.nz/2026/05/12/passengers-from-virus-stricken-cruise-fly-to-home-countries/
