O le vaaia o tagata ua aafia i āuga o le gasegase o le mafaufau e lē taugofie, ae o se gasegase foi e faasi’ugutua ma taufaifai iai nisi i se tagata ua maua i ona āuga.
O le faalapotopotoga o le Goshen Trust o se auaunaga tuma’oti i Samoa o loo ofoina lana fesoasoani i le tausia ma le vaaia o ia gasegase ma e faalagolago i fesoasoani e maua atu i le malo, o pisinisi ma tagata ta’ito’atasi.
O le Aso Toonai a o lumana’i le Aso Sa o Tinā sa feagai ai le faalapotopotoga ma sana sa’iliga seleni e faaaogā ai fesoota’iga i upega tafa’ilagi ma sa molimauina le alofagia e tagata ma pisinisi ma maua ai le silia i le 25 afe tālā.
Ae mo ana galuega e selau afe tālā o loo maua atu i le malo i tausaga ta’itasi e auala lea i le matāgaluega o le soifua mālōlōina.
I lea faamoemoe na faailoa ai e le alii foma’i o loo faauluulu iai le falema’i mo gasegase o le mafaufau, o se tasi lea o gasegase e sili ona tāua i le auaunaga faafoma’i ona o togafiti ma le vaaiga i aso uma.
Le alii foma’i o loo faauluulu iai le falema’i o le gasegase o le mafaufau, le susuga Dr Geroge Tuitama i upega tafa’ilagi na faasalalau ai le sa’iliga seleni a le Goshen Trust lea ua siitia lona nofoaga i Vailima ma e to’asefulutasi gasegase o le mafaufau o loo faamautū ai.
