I le 64 ai o tausaga talu ona faavae se tasi o kolisi maualuga a le Ekalesia Katoliko i Samoa le kolisi o Sagato Sanele i Moamoa, o loo tapena nei se mafutaga tele poo se reunion e toe feiloa’i ai i latou uma sa a’oa’oina i lea kolisi, ma o se avanoa e toe talanoa ai ma faamanatu aso o le talavou a o a’o’oga, aemaise o tala mālie o mea sa tutupu a o feagai ma a’oa’oga.
Ua faailoa i se lipoti a le vaega faasalalau o le Mermada o loo faafoe e se tasi o tama tuai o Sagato Sanele, o le aso 29 o le masina nei o Me e faia ai lea faatasiga tele o le a faamautū uma ona polokalame i le nofoaga o le Tofamamao i Leauvaa.
O loo valaaulia uma ai alii ma tama’ita’i sa a’oa’oina i Sanele e lē gata o i latou o loo i Samoa, ae o ē o loo aumau ma faamautū i atunuu i fafo.
Mo le silafia o lea kolisi sa amata i le tausaga e 1962 ina ua tuto’atasi Samoa ma sa na o alii sa a’o’oga ai peita’i o le tausaga e 1992 na tatala ai faitoto’a o le kolisi o Sanele i le itupa o tama’ita’i.
O se kolisi a le Ekalesia Katoliko sa faafailele ai le olaga a’oa’oina o nisi sa avea ma ta’ita’i o le malo.
O le afioga i le Akiepikopō ua avea nei ma ta’ita’i aoao o lea ekalesia i Samoa sa faafailele lona soifua a’oa’oina i le kolisi o Sanele ma o ia foi o loo ta’ita’i i tapenaga uma o le mafutaga tuufaatasi a tama ma teine tuai.
