O le sii maualuga o le tau o suāuu ma penisini i le lalolagi ma aofia ai ma Samoa ua ave ai le tuualalo a le ta’ita’i o le Itu Agai i le Palemia ma le faigāmalo, ina ia silasila i ni auala e fesoasoani ai i le siitaga ua iai nei le tau o ia oloa mana’omia, aemaise e sii atu ai ma le tau o isi oloa e pei o oloa o totoga o taavale.
E faasino le finagalo o le ta’ita’i o le Itu Agai le susuga Tuilaepa Lupesoliai Sailele Malielegaoi i le totogi o pasese mo pasi ma taavale laiti la’upasese.
I le faatalanoaina o Tuilaepa i auala o fesoota’iga televavave a le vaega faaupufai e puipuia aiā tatau a tagata o loo ia fautuaina ai le tasi o auala o le faaitiitia poo le tuu i lalo o le totogi o le Palemia ma Minisita o le Kapeneta e pei ona faia e le malo o Fiti, ma faapa’ū ai foi i lalo ma totogi o sui faipule o le Palemene.
I le fono a tusitala ma le Palemia i le vaiaso ua mavae ua faaalia e le ta’ita’i o le malo i le Palemia susuga Laaulialemalietoa Leuatea Polataivao Fosi, e lē mafai ona ‘aloese ai Samoa ma le tulaga ua iai nei le lalolagi i le tau o oloa tau suāuu ma penisini, ae i le faia o se siitaga o le totogi o pasese mo pasi ma taavale laiti la’upasese o se tulaga ua silasila nei iai le malo.
O loo gata mai le siitaga o le totogi o pasese mo taxi ma pasi i le tausaga e 2014 lea na siitia ai i le 15 pasene.
O lona uiga ua 12 nei tausaga talu ona faia lea siitaga.
I le tulaga lē mautonu ua iai nei le tulaga o le tau ma le maua o oloa tau suāuu ma penisini i le lalolagi ona o le taua i Sasa’e Tutotonu, ua faailoa e le malo o Ausetalia o le a fesoasoani ia Samoa ma isi atunuu o le Pasefika.
O lea fesoasoani sa faailoa e le Minisita o le Va i Fafo o lea malo i se feiloa’iga ma le Palemia o Fiti i le vaiaso ua mavae.
