O le afioga ia Afemata Tunumafono Apelu Aiavao lea ua faamanavaina e le Atua ana galuega mai luga o lenei fogaeleele.
O se tamalii ua loa foi lana tautua matavela mo Samoa ma ona tagata aemaise lava i le itu tau i faasalalauga ma tusigatala ae faapea le itu tau aoaoga.
O Afemata e lē tau faailo lona tagata auā e tēlē lona sao ia Samoa. E valaau le Atua ia Afemata ua 90 tausaga o lona soifua ma e mai i afioga o Safata, Leusoalii ma Motootua. I le tausaga e 1953 na tusia ai i le talafaasolopito a le atunuu lona suafa o se tama fanau muamua a Samoa na pasia le suega o le School Certificate i Niu Sila.
O le uluai taitai ulu (headboy) a le Kolisi o Samoa. Ua silia ma le 50 tausaga o le tautua a Afemata mo Samoa i le vaega o tusitala ma faasalalauga, o le toe ulutaia foi lea a Samoa i lea matafaioi. Na avea foi o ia ma faiaoga i le Kolisi o Samoa ma tofia ai e fai ma faatonu o le lomiga muamua a le Kolisi i le tausaga e 1963.
I le tausaga e 1979 – 2000 sa galue ai Afemata ma faauluuluga o faasalalauga a le ofisa o le Palemia ae le gata i lea sa ia tauaveina le tiute o sooupu ma le atunuu lautele mo mataupu uma a le Malo o Samoa.
I le tausaga e 2007 na galue ai loa o ia ma faatonu a le lomiga a le Ekalesia Faapotopotoga Kerisiano Samoa ua faaigoaina o le “Sulu o Samoa.”
I le tausga e 2017 na faamanuiaina ai loa Afemata i le faailoga faapitoa a le Ao o le malo i le tamalii ua loa lana tautua ia Samoa.
E toatele le mamalu o le atunuu ua faasoa o latou faanoanoaga i le tuua ai o le malo i le afioga ia Afemata i luga o upega tafailagi . O le isi vaega taua o le a misia ai le tautua a lenei tamalii o lona siufofoga mālū i le fofogaina lea o le polokalame faafagogo ua faaigoaina o le Palolomua i luga o le 2AP ae le gata i lea o lana lomiga ua tele ina faaoga i totonu o aoga ua taua “ Maunu mai Loimata o Apaula.”
