O loo faaauau pea ona fautuaina tagata i Sini ina ia usitaia pea fautuaga ma lapataiga ma faaitiitia le feoai i fafo mai o fale ina ia malupuipuia ai mai ni aafiaga o le asu o loo vaaia pea i le aai mai susunuga togavao o loo faia a o lumanai ai le tau vevela.
O loo faagasolo galuega ia a le vaega o le tineimu ma auaunaga uma o loo aofia ai ma le faamoemoe ia faaitiitia aafiaga o ni mu e sasao ane i togavao i le taimi o le tau vevela ua lata mai.
E ui i ona aafiaga e pei ona fautuaina peitai fai mai le vaega o le saogalemu o ni gaioiga e manaomia ona faia mo le puipuiga o le toatele.
O loo faaauau pea ona faamanatu e le matagaluega o le soifua maloloina i tagata e lē o maloloina le asu o loo taai nei i luga ane o le aai o Sini ma e ao ina nonofo i totonu o fale ma tapunipuni faitotoa ma faamalama.
O le lapataiga o loo faamamafa foi mo i latou e iai faaletonu i le mānava pe aafia foi i le sela, e ao ona alofia le agai i fafo mai o latou fale seia faamautinoa ua saogalemu.
