Ua tolopo le mataupu faasaga ia Michael Chang Wong, Venus Etevise Chang Wong, Tasi Divine Chang Wong Afamasaga ma Paulo Afamasaga i le aso 13 o le masina nei seia faamautu moliaga a leoleo ma tuuina atu sa la tou tali. 

O i latou ia o loo molia mai le osofaiga a leoleo i Malifa talu ai nei o moliaga o le umiaina o fualaau faasāina ma paipa e ula ai le aisa o loo molia ai i latou.

Na faailoa e le alii loia o loo tulai mo i latou ia Faimalomatumua Matthew Lemisio o loo tatala i tua le tina ia Venus ae o loo taofia pea i le vaaiga a leoleo Michael ma Tasi ma o loo tālia le la talosaga i le Faamasinoga Maualuga mo le tatala ai o i laua i tua.

O Paulo Afamasaga o loo molia faatasi o ia ma Michael i le moliaga o le umiaina o fualaau faasāina ma paipa e ula ai le aisa.

Ua tatala i tua Paulo Afamasaga e tālia ai le toe valaauina o lana mataupu i le aso 13 o Fepuari ma ua poloaiina e le faamasinoga ia nofo i Vailima i lona tuafafine, tuuina atu pepa malaga uma, lipoti i le ofisa o leoleo i Aso Faraile uma a o lei tāina le itula e 4 i le afiafi ma ia tapu ona toe fesootai i tagata sa molia muamua i ni moliaga faapea.