E toatolu tagata na maliliu i taimi o aso fiafia o le Kerisimasi o le tausaga ua mavae atu nei, ma le Tausaga Fou ua tatou amata savalia nei.
O lea ua faailoa e le Komesina o leoleo i se lipoti i lenei vaiaso le faia o suesuega i le maliu o se alii Niu Sila o se kapeteni o se vaa fagota.
E lē o tele ni faamatalaga ua faailoa e leoleo faatatau i le mafuaaga o le maliu ona o loo tālia se finagalo o le pule o maliu poo le coroner lea na te faatonuina le faia o se suesuega e sailia ai le mafuaaga o le maliu, poo le faia o se suesuega o le maliu lilo poo le inquest.
O le lipoti a le Talamua online o loo faailoa ai e le sui komesina susuga Papalii Monalisa Tiai Keti, o le alii Niu Sila ua maliu sa faailoa atu i leoleo i le po o le faauma poo le po o le vaeluaga ina ua mae’a le faaaliga o mea faapāpā.
O le vaa fagota na taliu ane i le uafu o vaa fagota i Savalalo sa iai le tino o le tagatanuu Niu Sila ua maliu.
O le tasi o maliu i le taimi o le Tausaga Fou o se alii 26 tausaga e faapea na mafua i ni manu’a na ia faatupu poo self-inflicted wounds.
O le tolu o tagata ua fano soifua o se alii lea na maua lona tino maliu i gataifale o Nofoalii ma e iai sona gasegase tumau.
E iai mataupu sa lipotia i leoleo i le taimi o aso fiafia o le Kerisimasi ma le Tausaga Fou ma o solitulafono e aofia ai le umia o nakoti poo laau ma fualaau faasāina, solitulafono tau taavaleafi e pei o le avetaavale onā, o le lafo o upu taufaifai ma upu faalumaluma ma isi solitulafono masani e pei o le lima tagoese ma le talepe fale.
