E to’atolu ni tama tane o le tatou atunuu ua sauni e tauvā i se tasi o taaloga lauiloa i le lalolagi, o le faaali tino poo le body building o le a faia i Sini Ausetalia i le faai’uga o le masina nei o Mati.
O se tauvāga o le a auai foi sui tauvā mai atunuu o le Pasefika e pei o Tonga, Tahiti, Amerika Samoa, Le Atu Kuki, Solomona, Ausetalia ma Niu Sila.
Ua faailoa i se pepa o faamatalaga o le autū o lea tauvāga mo tamafanau a le atunuu o le a auai o le sa’ilia lea o ni avanoa e see atu ai i le isi laasaga maualuga o le tauvāga e pei o le mafai lea ona tausinio i tauvāga faaali tino a le lalolagi.
Afai e manuia i le tauvāga i Ausetalia ma manumālō i le mauaina o le pro card ona saofagā lea e ulufale i tauvāga faaali tino e tausinio ai tagata o atunuu o le lalolagi e ese mai le Pasefika.
O i latou o le a malaga mo lea tauvāga o le susuga John Lemoa, Penitito Hanipale Seuao Fue, ma Mathew Wong Soon.
O le alii o Penitito sa manumālō i le tauvāga o le Mr Samoa i le tausaga na te’a i le 2024, ae sa ia maua le pine auro i le tauvāga faaali tino faavaomalo i le vaega laiti poo le junior division i le tausaga e 2019.
O Mathew sa manumālō i le Mr Samoa Classic i le tausaga e 2024, faapea foi ona manumālō i le Mr Samoa Classic Physique o le tausaga e 2024.
Na manumālō foi i le Mr Samoa Physique o le tausaga e 2021 ma le 2024.
O le taimi muamua lenei o le a ulufale atu ai i se tauvāga faaali tino faavaomalo.
O le aso 30 o Mati le tauvāga i Sini Ausetalia.
