O le aoaoga muamua lenei ua faatinoina e i latou mai le Matagaluega o Leoleo ua iai le tomai i le aoaoina ai malu o le Malo mo lenei auaunaga tāua.
A o tapena ai mo le fonotaga a Malo o le Taupulega i le tausaga fou lea o le a talimalo ai Samoa, o se tasi lenei o vaega e tulaga aloaia ma mamalu i auaunaga a le Matagaluega o Leoleo o le foeina lea o uilaafi e faaaloalogia ai Malo mai fafo pe a taunuu mai i le atunuu.
Ua faailoa e le Matagaluega i sana pepa o faamatalaga ua faataunuuina manuia le aoaoga na feagai ma sui e toaiva e aofia ai le toavalu o alii ma le tamaitai ua faauuina ma umia tusipasi i le faafoeina o uilaafi.
O le a faaauauina pea ona faatino aoaoga mo malu o le Malo ina ia mautinoa ua lava tapena le Matagaluega i tulaga o puipuiga i taimi o lenei fonotaga.
O se fiafiaga tele lea ona ua mafai ona faamae’aina manuia aoaoga uma sa feagai ma sui nei e toaiva ma e iai le talitonuga o le a siitia ai foi ma nisi o vaega o le auaunaga i ana tapenaga mo le fonotaga lenei i le tausaga fou.
