Ua faailoa nei e le Ofisa o le Tineimu ma faalavelave faafuasei (FESA) le taofia ai o sailiga mo se alii faifaiva 24 tausaga le matua lea na tafea agai le sami i Lotofaga i le Aso Tofi 24 o Iuni 2021.
Taua e le Komesina o le Tinemu Tanuvasa Petone Mauga “o le 12 itula muamua lava i le taimi e maua atu ai le ripoti e taua tele lea pe a fua atu i le tulaga o le ola pea o lē o loo sailia”
O le Aso Toonai 26 o Iuni na taofia ai loa le sailiga o lea alii talavou peitai o loo tatala pea le mataupu mo le mamalu o le atunuu e tuu atu ai ni faamaumauga latou te iloa mai lenei faalavelave.
Taua e Tanuvasa na maea loa le 24 itula o le sailiga o lea alii ona agai loa lea i le isi vaega e taua o le “search and recover” o loga uiga o le taumafai i soo se auala e sailia ai le tino o le alii faifaiva.
“e pei ona ou taua i le taimi ua sola e taua tele le 12 itula muamua ma e fa’aauau lava le sailiga a le ofisa seia vagana ua leaga le tulaga o le tau ona toafia loa lea mo le saogalemu.”
Na faamamafa ai foi e le Komesina le faataua lea o lapataiga ma fautuaga mai le Ofisa o le Vaai Tau ina ia taofia le agai i le sami pe a louloua le tau ma malosi le sua o le tai.
“Afai ae tuu atu e le Ofisa o le Vaai Tau lapataiga o timuga malolosi ma tafega e ono tuali mai e lē tatau i le atunuu ona manatu mama iai aua e taua tele lea mo le saogalemu o tagata uma”
Na amata sailiga a le Ofisa o le Tineimū ma Leoleo i le vaveao o le Aso Faraile 25 o Iuni ma na galulue foi i latou e māulu i le sami e saili peitai ua matuā le saogalemu lava tulaga o le tau e fa’aauau ai lea vaega.
