Sa taofia faigamalaga a le vaalele a le Air New Zealand i le aso ananafi ona o le tulaga faaletonu o se tasi o meatotino o loo faapea ona faaaogāina e tuuina ese pe tuuina ai ato a le pasese poo se uta foi poo le ground service equipment e le o talafeagai lea ma le tulaga e ao ona faatinoina ai le auaunaga.

I ripoti mai le kamupani vaalele na logoina le vaalele i le po o le Aso Faraile ua mavae nei o le equipment lea e faaaogāina e teu ai pe uta ese mai ato a le pasese ma nisi o uta i le vaalele e le o iai i se tulaga lelei. 

Na ta’ua e le Faauluuluga o le kamupani vaalele a le Air NZ i le Pasefika, Brent Roxburgh o le 12 masina talu ai na galulue ai le kamupani vaalele ma i latou o loo nafa ma lenei auaunaga i Samoa ina ia mautinoa e saogalemu le tulaga o loo iai le auaunaga i le vaega o le ground.

“Mo le saogalemu ma le malupuipuia o tagata o la matou faamuamua lea na logoina ai e le kamupani ana auaunaga tau femalagaiga e taofi se’i mae’a toe faaleleia lenei vaega.”

Ua afua ai loa ona taofia le tumau auaunaga a vaa tetele e ala i femalagaiga mai ma le toe foi ese atu ma Apia mai le aso 9 o Setema ma le aso 11 o Setema.

O le vaa tele 998 a le Air NZ na alu ese mai le malae vaalele i Aukilani i le Aso Toonai na toe liliu vave ma toe foi i le malaevaalele i Aukilani ona o le tulaga sa iai.

“Na galulue punouai lava le aufaigaluega ina ia mautinoa e toe sui se isi vaalele laititi e mafai ona faimalaga ai nai isi tagata o loo ua mae’a tapena foi se tasi o faigamalaga mo le aso 11 lava o le masina nei mai Aukilani i Apia ma toe foi atu i Aukilani e faimalaga ai nai isi tagata ae o le taimi nei o loo fuafua e toe faaauauina faigamalaga a tatou vaa tetele i le aso 12 o Setema o le asō lea.”

Ae peitai o loo faatulagaina lava le fuainumera mo i latou o lea faigamalaga i nei vaalele.

“Ona o le tulaga toatele o i latou sa fuafuaina i faigamalaga masani, e ono iai nai fesuiaiga ia latou pepa malaga i aso na faatulagaina mo faigamalaga ae o loo taumafai lava le kamupani e foia lenei faafitauli.
“O loo galulue foi le aufaigalluega i Aukilani ma Apia e tapena apitaga mo nai tagata pe a manaomia.

“E talitonu e faigata ma faatiga foi lenei faafitauli ua tulai mai i nai pasese ae momoli atu ai le faamalo ona o le onosai foi i nisi o vaega o le auaunaga ma faafetaia ai le lagolago mai i lau kamupani vaalele.

“E tāua tele la matou auaunaga tau femalagaa’iga i le Pasefika ma e galulue pea ma le vaega o malaevaalele i Samoa ina ia mautinoa pea le saogalemu o auaunaga a le Air NZ i le Pasefika.”