O le manatu a le taitai o le vaega faaupufai e Puipuia Aiā Tatau a Tagata le HRPP o le taitai foi lea o le Ituagai Tuilaepa Lupesoliai Sailele Malielegaoi e tatau ia Laauli ona ave lana faamuamua i le tofiga ua tōfia ai o ia ae tuu mataupu tau i le va i fafo e feagai ma le Taitai o le atunuu le Tamaitai Palemia.
Ua afua nei faamatalaga ona o se faatalatalanoaga a le Minisita o Faatoaga ma Faigafaiva Laauli Leuatea Polataivao Schmidt ma le Niusipepa o le Samoa Observer i mataupu tau i pepe faapa’ūū (abortion). Taua e Tuilaepa i lana feiloaiga ma Tusitala i le taeao nei ua leva tele le faigapaaga a Samoa ma le Malo Aufaatasi le UN ma o le tele foi o manatu faaalia a le UN e lagolago ai Samoa ma e iai foi nisi manatu e lē o gatasi ma faiga faavae o le atunuu. Na ia toe faamanino e lē lagolago foi e le HRPP ma le Ituagai le manatu lea ina ia faataga le faapa’ū o pepe i le atunuu.
Peitai manatu Tuilaepa o nisi lafoga a Laauli na faia i le faauluuluga ale Faalapotopotoga ia Simona Marinescu e matuā lē talafeagai tele ma ea tatau fai se faatoesega a Laauli i le sui o le Malo Aufaatasi.
Taua e Tuilaepa ua tuuaia fua lea sui o le faalapotoptoga i ni manatu e faapea o le tamaitai lea na tu malosi e unai le 10 % mo tamaitai i le Palemene. O le faamanatu a Tuilaepa o Faalapotopotoga nei na tu malosi i le
Tutoatasi o Samoa ma o se paaga o loo telē le
fesoasoani i le atunuu peitai a fai o le soona lafo o faamatalaga faapea i faauluuluga o le Mālō
Aufaatasi e ono aafia ai le sootaga ma le atunuu.
Na fautuaina ai foi e le taitai o le Ituagai le Tamaitai Palemia ina ia tagatagai ai i lea tulaga mo le agai i luma.
