O le feiloaiga a le tamaitai Palemia ma le vasega o Tusitala i le vaiaso na tea nei na toe tuliloa ai i le suesuega ua faia i le pasese e to’a 73 mai Brisbane lea o loo iai tuuaiga na malaga atu ai ma se aiga i le faamoemoe e auai i se maliu ae le’o faatagaina le malaga atu o nisi i ia faalavelave masani a le atunuu ona o puipuiga mai le koviti19.
Ina ua fesiligia e tusitala le afioga Fiame Naomi Mataafa poo le a se silasila a lana afioga i le malaga lea mai Ausetalia lea e faapea o i latou na malaga atu ua aafia maualuga ai se fainumera ma le toe matimati o se isi tulaga ina ia matuā saili lelei faamaumauga o pasese ae lei ulufale i Samoa ina ia mautinoa e moni ma faamaoni faamaumauga na tali Fiame…..
“ E sa’o lava le fesili o le mea foi lea e avea a mea tutupu e toe tulai mai ai foi e le gata o le faafesili ae pe toe iloilo ia aiaiga o loo faagasolo ai le tatou galuega o le faafoi mai o tagata i Samoa. O le tatou aiaiga lea e taatia ai nei ua fia nei malaga o le tele a lea sa saofagā e taitasi mai isi cases ae pei ua tulaga ese le malaga lea mai Ausetalia.”
Taua foi e lana afioga “O le faamatalaga lea na aumai e ova i le 200 le pasese sa fuafua mo le vaalele lea ae o le faaaogaina o aiaiga lea na vaea ai le toatele o le isi vaega totoe ai loa ma le 73 lea na malaga mai ae o le mea lena lea e tupu, toe faafoi ma faafesili poo le a le mea na tupu e mafai ai ona tau maua mai se ataata pe faafefea lava ona sao le siama ma tauave mai ai e i latou na malaga mai”.
Faailoa foi e le Palemia o aiaiga uma lava sa faatino i isi malaga togipau lea na faaoga ai aiaiga mo lea foi malaga, e le gata i lea e tele ina iai suiga o aiaiga a isi atunuu o lona uiga e tatau foi ona vaavaai Samoa ina ia fai nei suiga mo le lelei o le puipuiga.
