O le uluai mataupu na talanoaina i le fono uso a le Palemene i le asō o le tulafono taufaaofi o teuteuga o le tulafono o faigapalota no.2- 2021 i lona faitauga muamua ma le lua. 

Peitai talu ai ona ua taulimaina e le Fofoga Fetalai le faaliga o le tulaga faanatinati i lea tulafono lea na agai ai loa le fono e talanoaina le tulafono i lona faitauga faalua ma faagasolo ai.

O le afioga i le Minisita o Faigapalota Faualo Harry Schuster na tulai e faamalamamala suiga mo lea tulafono taufaaofi “O lenei tulafono e le’o se tulafono telē tele e lē tele foi ni suiga ae e taua ia suiga mo le faatinoina o galuega a le Komesina o faigapalota ma le Matagaluega faapea foi le toe faagatusa o aiaiga na iai i le agavaa o sui tauva mo le faigapalota na tatou tauva ai mo le Aso 9 o Aperila ma aiaiga foi mo sui tauva o palota laiti lea e agai atu iai e mafua mai i le faaiuga a le faamasinoga”.

O tulaga o suiga ma tele ina fesiligia e sui mamalu o le fono o le vaega i monotaga a sui faipule, Taua e Faualo  “O lenei teuteuga e faamautinoa ai le aofia o monotaga faalelotu ua faatinoina e se faalapotopotoga faalelotu ua maea ona resitala i lalo o le tulafono mo le 3 tausaga sosoo e o gatusa foi ma manaoga faaletulafono mo monotaga faaleaganuu.”

O se tulaga na faaalia ai manatu o faipule e le au i lea suiga ona o monotaga faaleaganuu i le latou maitau o lou auai i fonotaga a le nuu e talanoaina ai vaega eseese mo le agai i luma 

Taua e le sui faipule o Sagaga No. 1 Loau Solamalemalo Keneti Sio “O le monotaga e lautele lona faataatiaga i le matou nuu, e le gata o lau mea fai ao lou auai, ma vaaia lou tagata (tulou) pe vaaia lou tino i fonotaga ma ia iai sou sao, a faapea la e te faimai o lae fai lau saogatupe ma fai au saogamea ae ete lē auai i le fono a le nuu ma e lē participate i le faatalanoaga o mataupu a le nuu e le’o atoa la lau monotaga”.

O se manatu na lagolagoina e le sui faipule o Vaimauga No.1 Sulamanaia Tauiliili Tanuvasa “O le vaaiga a le sui i le tulafono lenei o lea ua tatou vavae ese Pulega a alii ma faipule ua saofāga ai e e le’o fai nuu e le’o oatu e fai ni galuega i totonu o afioaga ao lea o le a faataua tulaga lea, o lo’u popolega o lea ua tatou faia tulafono e aveese ai le aganuu aveese tulaga faale Ekalesia, e mamalu le Ekalesia i Pulega a alii ma faipule”. Na ave ai foi le tuualalo a le sui faipule i le alii Minisita ina ia toe tagatagai i lea vaega.

O loo faaauau pea e faaali o manatu a sui faipule a le fono mamalu a le Palemene i lea teuteuga o le tulafono o faigapalota.

Developing story….