Ua lē toe iai se Three Waters ae o lea ua Affordable Water Reforms, peitai e ono lē fesoasoani lea i le toatele o tagata e le lagolagoina.
A o fai mai ai le malo ananafi ua aveese le Three Waters poo le suiga na fofola mai e pulea le suavai a le atunuu, o le suiga tele ua sau ai o le suia mai le na o le 4 pulega faaitumalo i le 10 ma e faapea o loo faatumau ai pea le pulea e nuu o aseta nei ma ua faaopoopo le avanoa e faaleo ai leo o councils.
Peitai o le itu e le o aveesea o le pulea toalua e tagata Maori poo Manawhenua ma councils o le suavai.
O se suiga fai mai le malo e le o mafai e councils taitasi ona faatupe le tele o poloketi tau i le suavai, ma o le pulega fou lenei afai ae taunuu o le a ia totogia aitalafu nei ma gafa ma nonogatupe.
O le suiga fou ua faailoa mai e faapea o le a mauavanoa ai pulenuu uma o aai e nofoia le laulau, peitai e le o talia ma tosina gofie ai nisi o pulenuu na faaali manatu i tala a le Newshub.
Fai mai le malo o le a tele tupe faasao a tagata mai le pulega fou.
Ae mai le taitai o le National o Christopher Luxon, ua na ona sui o le igoa ae o loo Three Waters lava, ma e le suia le faaiuga a le National e na te faaleaogaina pe a tulai mai.
O le tausaga fou lea na muamua faailoa mai e aloaia ai lenei suiga, peitai o lea ua tuu atu i tua i le aso muamua o Iulai, 2026.
