E to’a 40 se aumalaga mai Samoa o nisi o loo lotolotoi i le faafoeina o tautua faapisinisi mo le atina’e o tagata tafafao, ua sauni e faalauiloa Samoa i totonu o le atunuu tele o Ausetalia.
O lea taumafaiga e ta’ua o le Beautiful Samoa Australia Roadshow o loo taulai lava i le faatosina mai o tagata tafafao o lea atunuu o se tasi o maketi autu o tulisi mo Samoa ina ia malaga mai e tafafao ma faaaogā a tatou auaunaga eseese e fesoota’i i le atina’e o tulisi.
O aai tetele e fā o le a afea ua aofia ai mo le taimi muamua Adelaide, ae o le a afea Melepone, o Sini ma Brisbane.
O le aso 19 i le aso 22 o le masina fou o Aokuso e faagasolo ai lea faalauiloa i Ausetalia ma le faamoemoe o le a maua ai le avanoa o i latou o loo faagaioia auaunaga tau tagata tafafao e talanoa ma faasoa ia i latou o loo maketiina tagata tulisi i totonu o lea atunuu.
Ua faailoa foi e le pulega o tagata tafafao mai fafo a Samoa, se isi laasaga lelei i le taumafai lava e siitia lenei atina’e i le atunuu, o le faaopoopo lea o avanoa e maua e tagata e fia malaga mai i Samoa i le tautua a le kamupani vaalele o le Air New Zealand.
E 13 afe nofoa faaopoopo mo malaga uma a lea kamupani vaalele e agai mai i lo tatou atunuu ma ua tele ai avanoa mo le aumalaga mai aemaise o tulisi e fia tafafao mai i lo tatou atunuu.
O Novema o le tausaga nei faasolo atu ia Mati o le tausaga fou 2025 o le a maua ai lea faaopoopoga tele o avanoa mo tagata e fia malaga mai i Samoa i vaalele o le Air New Zealand.
